სიახლეები
ჩირდილელიანთკარსა და გრიგოლაანთკარში სასმელი წყლის სისტემა მოეწყო
ბაზალეთის ადმინისტრაციულ ერთეულის სოფლებში - ჩირდილელიანთკარსა და გრიგოლაანთკარში მოეწყო სასმელი წყლის ორი ჭაბურღილი, რაც აღნიშნული სოფლების მოსახლეობას წლების განმავლობაში არსებულ უწყლოობის პრობლემას გადაუჭრის.

რეგიონში განსახორციელებელი პროექტების ფონდიდან დაფინანსებული პროექტის ფარგლებში, სასმელი წყლის ჭაბურღილებთან ერთად მოწყობილ იქნა ცენტრალური სისტემა, ორი 50 ტონიანი წყალშემკრები ავზი და საუბნო ონკანები. წყლის დებეტის საკმარისი რაოდენობა 300-მდე მოსახლეს 24 საათიანი უწყვეტი წყალმომარაგებით უზრუნველყოფს.

დასრულებული სამუშაოების მოსანახულებლად ადგილობრივ მოსახლეობასთან ერთად ჩირდილელიანთკარში იმყოფებოდნენ: რეგიონული პროექტების მართვის დეპარტამენტის უფროსი ირაკლი თოფურია, მცხეთა-მთიანეთის სახელმწიფო რწმუნებული შალვა კერესელიძე, სახელმწიფო რწმუნებულის მოადგილე მანანა ნარიმანიძე, დუშეთის მუნიციპალიტეტის მერი ზურაბ სეხნიაშვილი და მუნიციპალიტეტის მერის პირველი მოადგილე გიორგი თანიაშვილი.


დუშეთის მუნიციპალიტეტის მერის თქმით, აღნიშნულ სოფლებს არასდროს ჰქონიათ წყალმომარაგების ცენტრალური სისტემა და მისი შექმნა წინასაარჩევნო დაპირება იყო, რაც წარმატებით შესრულდა. "მე მიხარია, რომ ბოლო ორი წლის განმავლობაში სოფლის მოსახლეობის ყოფა ცოტათი მაინც გავაუმჯობესეთ, აქ განხორციელებული სამუშაოებით"- განაცხადა ზურაბ სეხნიაშვილმა.
FaceBook Twitter Google