დუშეთის მუნიციპალიტეტის მერიაში მცხეთა-მთიანეთის მხარის სახელმწიფო რწმუნებულის მოადგილემ გოჩა ქავთარაძემ და ზრუნვის სააგენტოს რეგიონალური ცენტრის ხელმძღვანელმა ლალი უნდილაშვილმა, მერიის თანამშრომლებისათვის მუნიციპალიტეტის მერის პირველ მოადგილესთან ვასილ წიკლაურთან ერთად საინფორმაციო შეხვედრა გამართეს.

საუბრის მთავარი თემა ჯანმრთელობის დაცვის მიზნით არსებულ სახელმწიფო პროგრამებს შეეხებოდა.

შეხვედრას მერიის თანამშრომლებთან ერთად ესწრებოდნენ ადმინისტრაციულ ერთეულებში მერის წარმომადგენლები, შესაბამისი სამსახურებისა და ა(ა)იპ-ების ხელმძღვანელები.

შეხვედრის ფარგლებში მხარეებმა დეტალურად განიხილეს ის ქვეპროგრამები, რომლებიც გულისხმობს ბავშვზე ზრუნვისა და ახალგაზრდების მხარდაჭერას, ასევე, შეზღუდული შესაძლებლობის მქონე პირთა და ხანდაზმულთა ფიზიკური და სოციალური მდგომარეობის გაუმჯობესებასა და საზოგადოებაში ინტეგრაციის ხელშეწყობას.

ამასთან, სააგენტოსა და ადგილობრივი ხელისუფლების წარმომადგენლებმა განმარტეს, რომ მოსახლეობის სწორი ინფორმირება არსებული სახელმწიფო პროგრამების შესახებ, განსაკუთრებით მნიშვნელოვანია. ამისათვის კი, მხარეებს შორის აქტიური და კოორდინირებული მუშაობაა საჭირო.

თავის მხრივ კი, შეხვედრის მონაწილეებმა - შესაბამისი სამსახურების, ა(ა)იპ-ებისა და მერის წარმომადგენლებმა ადმინისტრაციულ ერთეულებში, მჭიდრო თანამშრომლობისათვის მზადყოფნა გამოთქვეს და აღნიშნეს, რომ თემის შესახებ ადგილობრივებისთვის სათანადო ინფორმაციის მიწოდების მიმართულებით ინტენსიურად იმუშავებენ.