დუშეთის მუნიციპალიტეტის მერის მოადგილე ოთარ ჩხეიძე ინფრასტრუქტურის სამსახურის ხელმძღვანელთან იოსებ ღარიბაშვილთან ერთად, მჭადიჯვრისა და ჭონქაძის ადმინისტრაციულ ერთეულებში მიმდინარე საპროექტო სამუშაოებს გაეცნო.

აღსანიშნავია, რომ სოფელ მჭადიჯვარში ამ ეტაპზე დასასრულს უახლოვდება საბავშვო ბაღის შენობის და ეზოს კეთილმოწყობის პროცესი. 385 627 ლარის ღირებულების პროექტის ფარგლებში, გათვალისწინებულია მშენებლობის, შიდა წყალ-კანალიზაციის, გათბობა-ვენტილაციის, განათების, არსებული ინვენტარის ჩანაცვლების, ეზოს შემოღობვის და სათამაშო ატრაქციონების მოწყობის სამუშაოები.

რაც შეეხება ჭონქაძის ადმინისტრაციულ ერთეულს, აქ სოფელ არღუნში მისასვლელი გზის რეაბილიტაცია ხორციელდება. 485 000 ლარის ღირებულების პროექტი ითვალისწინებს საავტომობილო გზის მოხრეშვა-მოშანდაკებას, სანიაღვრე არხების მოწყობას და გზის სავალი ნაწილის ასფალტო-ბეტონის საფარით დაფარვას.

აგრეთვე სოფელ ტონჩაში მიმდინარეობს 850 323 ლარის ღირებულების სასმელი წყლის სისტემის რეაბილიტაციის პროექტი, რომლის დასრულების შედეგადაც სოფლის მაცხოვრებლებს წყლის მიწოდების პრობლემა მოუგვარდებათ.

"აღნიშნული პროექტები დაფინანსებულია რეგიონებში განსახორციელებელი პროექტების ფონდისა და ადგილობრივი ბიუჯეტის თანადაფინანსებით და მათი დროული და ხარისხიანი შესრულება ჩვენი პრიორიტეტია " - განაცხადა ოთარ ჩხეიძემ.