ელექტრომომარაგების სამუშაოები, ეკონომიკისა და მდგრადი განვითარების სამინისტროს ინიციატივით, სს "ენერგო-პრო ჯორჯიამ" შეასრულა.

ბარისახოს ადმინისტრაციული ერთეულის სოფლებში ახლად მოწყობილი ელექტროგამანაწილებელი ქსელი დუშეთის მუნიციპალიტეტის მერმა, კახაბერ ჩიტაურმა და მცხეთა-მთიანეთის სახელმწიფო რწმუნებულის მოადგილემ, გოჩა ქავთარაძემ, თვითმმართველობის სხვა წარმომადგენლებთან ერთად დაათვალიერეს.

„აღნიშნული სოფლების ელექტროფიცირება საქართველოს პრემიერ-მინისტრის უშუალო ჩართულობით მოხდა. აქ ელექტროენერგია მანამდე არასდროს ყოფილა.

დუშეთის მუნიციპალიტეტის დაახლოებით 70% მაღალმთიანია. ჩვენი გუნდის ერთ-ერთი მთავარი მიზანია, რომ მთას დავუბრუნოთ მთიელი. ეს იქნება ჩვენი ქვეყნის გაძლიერება.“ - განაცხადა კახაბერ ჩიტაურმა.

თვითმმართველობის წარმომადგენლების თქმით, მოსახლეობის ცხოვრების პირობების გასაუმჯობესებლად, ცენტრალურ ხელისუფლებასთან კოორდინირებული მუშაობა ინტენსიურად გაგრძელდება.

„ხელისუფლების ერთ-ერთი პრიორიტეტი მაღალმთიანი დასახლებების განვითარებაა. სოფლების ელექტროფიცირება მნიშვნელოვანი ნაბიჯია სოციალური თვალსაზრისით. ელექტროენერგიის მიწოდება ქმნის ახალ შესაძლებლობებს, ხელს უწყობს სოფლების განვითარებას, მოსახლეობის ადგილზე დამაგრებასა და დაბრუნებას.

ჩვენი მიზანია, მცხეთა-მთიანეთის ყველა სოფელს ჰქონდეს თანაბარი პირობები, როგორც ინფრასტრუქტურის, ისე სოციალური სერვისების ხელმისაწვდომობის თვალსაზრისით. ვიცით, რომ აღნიშნული მიმართულებით გვაქვს გარკვეული გამოწვევები, თუმცა ყველა შესაბამისი უწყების ჩართულობით, აქტიურად ტარდება სათანადო ღონისძიებები.“ - განაცხადა გოჩა ქავთარაძემ.

დუშეთის მუნიციპალიტეტის სოფელ ანანურში სახალხო დღესასწაული „მთაბარობა“ აღინიშნა.

ღონისძიებას, შეკრებილ საზოგადოებასთან ერთად, მცხეთა-მთიანეთის მხარის სახელმწიფო რწმუნებული ალექსანდრე ზაგაშვილი, დუშეთის მუნიციპალიტეტის მერი - კახაბერ ჩიტაური, საკრებულოს თავმჯდომარე ნუკრი უნდილაშვილი, სახელმწიფო რწმუნებულის, მერისა და საკრებულოს თავმჯდომარის მოადგილეები და თვითმმართველობის სხვა წარმომადგენლები ესწრებოდნენ.

"გილოცავთ „მთაბარობის“ სახალხო დღესასწაულს, რომელიც ჩვენი მუნიციპალიტეტის სხვადასხვა კუთხეს აერთიანებს. აღნიშნული ტრადიცია გაგრძელდება მომავალშიც. მინდა, მადლობა გადაგიხადოთ ღონისძიების მონაწილეებსა და დამსწრეებს, ყველა იმ ადამიანს, რომელმაც საზეიმო განწყობა შექმნა“. - განაცხადა სიტყვით გამოსვლისას კახაბერ ჩიტაურმა.

სადღესასწაულო პროგრამის ფარგლებში, სოფელ ანანურის დასასვენებელი სკვერის მიმდებარედ მოეწყო საგამოფენო, სადეგუსტაციო და საბავშვო-გასართობი სივრცეები. ასევე ჩატარდა კონცერტი, ადგილობრივი ანსამბლების, ბენდ ¼-ისა და ლინდა ადამიას მონაწილეობით. საღამო დიჯეი გიგა პაპასკირმა დაასრულა.

დუშეთის მუნიციპალიტეტის მერი კახაბერ ჩიტაური დუშეთის მუნიციპალიტეტში ახლად არჩეული საკრებულოს პირველ სხდომას დაესწრო.

საკრებულოში წარმოდგენილ 34 წევრს შორის, ხმათა უმრავლესობით, საკრებულოს თავმჯდომარედ აირჩიეს ნუკრი უნდილაშვილი, თავმჯდომარის პირველ მოადგილედ - გიორგი ასლამაზიშვილი, ხოლო მოადგილეებად - ლევან შერმადინი და გვანცა ესტატიშვილი.

საკრებულოში დაკომპლექტდა 5 მუდმივმოქმედი კომისია და აირჩიეს მათი თავმჯდომარეები - სამანდატო, საპროცედურო საკითხთა და ეთიკის კომისია - გივი ზურაბაშვილი; საფინანსო-საბიუჯეტო კომისია - ლევან მწითური;

სივრცით-ტერიტორიული დაგეგმარებისა და ინფრასტრუქტურის კომისია - ელგუჯა უნდილაშვილი; ქონების მართვისა და ბუნებრივი რესურსების საკითხების კომისია - ალექსანდრე ბუჩუკური;

სოციალურ საკითხთა კომისია - ქეთინო კახურაშვილი. საკრებულომ ცნობად მიიღო ორი ფრაქციის შექმნა: „ქართული ოცნება - დემოკრატიული საქართველო“ - თავმჯდომარე გიორგი რუბაშვილი;

„ხალხის ძალა“ - თავმჯდომარე ნათია კაჯილაშვილი. საკრებულოს პირველივე სხდომაზე დამტკიცდა საკრებულოს რეგლამენტი.

დუშეთის მუნიციპალიტეტის დაბა ჟინვალში 150 ბავშვზე გათვლილი, ახლად რეაბილიტირებული საბავშვო ბაღი გაიხსნა.

სკოლამდელი აღზრდის დაწესებულება დუშეთის მუნიციპალიტეტის მერმა მაცაცო ნარიმანიძემ, მცხეთა-მთიანეთის დელეგატმა დიმიტრი ხუნდაძემ, საკრებულოს თავმჯდომარე კახაბერ ჩიტაურმა და მხარის სახელმწიფო რწმუნებულის მოადგილეებმა - ჯონი ბერუაშვილმა და გოჩა ქავთარაძემ დაათვალიერეს.

„პროექტი მუნიციპალური განვითარების ფონდის დაფინანსებით განხორციელდა. ახლად რეაბილიტირებული შენობა სრულად აკმაყოფილებს თანამედროვე სტანდარტებს და უზრუნველყოფს უსაფრთხო და კომფორტულ გარემოს.

საბავშვო სივრცეების კეთილმოწყობა ჩვენი მთავარი პრიორიტეტია. გვინდა, ბავშვებმა ისწავლონ ჯანსაღ, სათანადოდ აღჭურვილ გარემოში. მოხარული ვართ, რომ დაბა ჟინვალში უკვე ფუნქციონირებს თანამედროვე სტანდარტების საბავშვო ბაღი, რაც კიდევ ერთი მნიშვნელოვანი ნაბიჯია ჩვენი მუნიციპალიტეტის განვითარების პროცესში,“ - აღნიშნა მაცაცო ნარიმანიძემ.